Intizamat nay siray say sanbhalay jay by Rahat Indor راحت اندوری

 انتظامات نئے سرے سے سنبھالے جائیں

جتنے کم ظرف ہیں محفل سے نکالے جائیں

میرا گھر آگ کی لپٹوں میں چھپا ہے لیکن

جب مزا ہے ترے آنگن میں اجالے جائیں

غم سلامت ہے تو پیتے ہی رہیں گے لیکن

پہلے میخانے کے حالات سنبھالے جائیں

خالی وقتوں میں کہیں بیٹھ کے رولیں یارو

فرصتیں ہیں تو سمندر ہی کھنگالے جائیں

خاک میں یوں نہ ملا ضبط کی توہین نہ کر

یہ وہ آنسو ہیں جو دنیا کو بہا لے جائیں

ہم بھی پیاسے ہیں یہ احساس تو ہو ساقی کو

خالی شیشے ہی ہواؤں میں اچھالے جائیں

آؤ بستی میں نئے دوست بنائیں راحت

آستینوں میں چلو سانپ ہی پالے جائیں